بسم اللہ الرحمن الرحیم
خوش آمدید
Amma ki library ka maqsad kya hai?
- Urdu zubaan ko apne dilon me muhabbat se saja ke rakhna aur roz marha ki zindagi main, apni soch o fikr main aur labon par, iss dilkash zubaan ko ko farawani se istemaal karte rehna.
- Apne bachon ko urdu se qurbat ka har mauqa faraham karna aur unhen apni pehchaan ke iss pehloo pe fakhr karne ki zeenat dena.
- Bachon ke lie urdu ke farogh karne walon ko sarahana aur hum-fikar logon se mel milaap barhana.
Amma ki library ki peeche hum kaun hain?
Amma ki library ke benaam darwazon ke peeche hai humari Pakistani-Canadian family jiss ka talluq Montreal se hai. Hum sab ko kitaben parhna aur kahanian sunna aur sunana behadd pasand hai.
Mutalla aur kitabon se lagao hona early childhood development ke lie kitna ahm hai, ye jaante hue, hum ne chaha ke jo urdu ki kitaben public libraries main dastiyaab nahin hain, hum woh kami poori karen.
Aap kaise Amma ki Library ka istemaal kar sakte hain?
Hum kai saalon se apne lie bachon ki pyari pyari kitaben (aur kuch baron ki) jama karrahe hain. Zakheera doosron se baanta jae to ban jaata hai khazana, yeh soch kar hum ne apni kitabon ko ek library ki shakal di hai.
Montreal aur muzafaat, saath saath Ottawa main, hum deegar taqreebat me mojood hone ka irada rakhte hain. Hum chahte hain ke pop-up library aur storytime ke ilawa deegar in-person aur online sargarmion ki shakal main aap ko kitaben se lutf andoz hone ka mauqa den.
Borrow karne ke lie hum se ruju karen. Agar Montreal me hain to kitabon aur kirdaron se milne ke mauqa dastayab hain. Canada ke aur shahron main muqeem hain to hum se contact karye, shayad kitabon ko post ke zarye aap tak safar karne ka mauqa mil jae.
